MAHAKAMA ya Wilaya ya Maswa, Mkoa wa Simiyu imemhukumu Seleman
Emanuel (21) mkazi wa Kijiji cha Sayusayu wilayani humo kwenda jela
miaka 30 baada ya kupatikana na hatia ya kufanya mapenzi na mwanafunzi
na kumsababishia ujauzito.
Hukumu hiyo ilitolewa jana na Hakimu Mfawidhi wa Mahakama hiyo
Fredirick Lukuna baada ya kuridhika na ushahidi uliotolewa mahakamani
hapo na upande wa mashitaka bila kuacha shaka.
Akitoa hukumu hiyo, Hakimu huyo alisema kuwa anatoa adhabu hiyo ili
liwe fundisho kwa watu wengine wenye nia mbaya ya kutaka kutenda kosa
kama hilo katika jamii.
Awali ilidaiwa mahakamani hapo na Mwendesha Mashitaka, Mkaguzi wa
Polisi, Nassibu Swedy kuwa mshitakiwa alitenda kosa hilo mwezi Julai
mwaka jana .
Mwendesha Mashitaka aliieleza Mahakama hiyo kuwa mshitakiwa
alishirikiana kimwili na mwanafunzi huyo kike (jina linahifadhiwa)
mwenye umri wa miaka 17 ambaye alikuwa Kidato cha Pili katika Shule ya
Sekondari ya Isanga na kumsababishia ujauzito.
Tupe Maoni Yako( Matusi Hapana )
