Wauguzi waliosimamishwa kazi ni Agnes Mapashe, Beatrice Temba, Mariam Mohamed, Merion Said, Hadija, Salum na Elizabeth Mwilawa. Wauguzi hao walidai vifaa hivyo kwa Roshan Seif aliyefika hospitalini hapo kujifungua. Mtu huyo alitakiwa kupeleka baadhi ya vifaa vya kujifungulia, ikiwa ni pamoja na glovu kwa madai kuwa havipatikaniki hospitalini hapo.
Mbali na hatua hiyo , uongozi wa hospitali hiyo umepewa miezi mitatu kuhakikisha umeboresha wadi ya watoto wachanga kwa kuongeza idadi ya vitanda kutoka tisa vilivyopo ili kila mtoto aweze kulala kitanda chake peke yake.
Kadhalika, uongozi wa hospitali hiyo umepewa siku 30 kununua vifaa katika chumba cha upasuaji kwa wanawake, waweze kuwa na chumba chao maalumu peke yao, ikiwa ni kupunguza idadi ya wanaopewa rufaa na kwenda kutibiwa katika Hospitali ya Taifa Muhimbili.
Dk Kigwangalla alifikia uamuzi huo hospitalini hapo jana baada ya kufanya ziara ya kushtukiza kwa lengo la kutaka kujua changamoto mbalimbali, wanazokumbana nazo wagonjwa katika kupata huduma za afya.
Kuhusu wauguzi waliosimamishwa kazi, aliutaka uongozi wa hospitali hiyo kuwachunguza hadi kujulikana mmoja wapo aliyehusika kudai rushwa hiyo ili hatua ziweze kuchukuliwa, kwa lengo la kukomesha vitendo hivyo vyenye kusababisha hatari kwa usalama wa wazazi na wajawazito.
Aliutaka uongozi wa hospitali hiyo, kuchukua hatua dhidi ya watumishi hao waliohusika kudai rushwa kwa wateja, ilhali wao wakiwa na kazi nzuri wakilipwa vizuri kulingana na taaluma zao.
“Mchukue hatua dhidi ya watumishi waliodai rushwa kwa wateja. Hawa wanatuangusha, tunataka kupunguza vifo vya wajawazito, lakini wao wanaturudisha nyuma, wanadai glovu na vifaa, Mganga Mkuu wa Manispaa wafuatilie wote na mchukue hatua za kinidhamu,” alisema Dk Kigwangalla.
Alisema vilevile wauguzi hao, wakabidhiwe kwa Baraza la Wauguzi nchini ili kuchunguza mienendo yao ya maadili kwa kuwa hata katika sera ya afya nchini, hairuhusiwi kudai vifaa kwa wajawazito.
Kabla ya kufikia uamuzi huo, Dk Kigwangala alielezwa na mmoja wa ndugu wa mama aliyekwenda kujifungua, akitaka kujua kama wajawazito wenye kadi ya bima ya afya iwapo hawaruhusiwi kutibiwa bila kuwa na vifaa vya kujifungulia.
Ndugu huyo aliyetambulika kwa jina la Ismail Mkingi, alidai kuwa alimfikisha mama huyo hospitalini hapo jana kwa ajili ya kujifungua, lakini akiwa katika hatua za mwisho za kujifungua, ndipo muuguzi aliyekuwa akimshughulikia alimtaka akanunue vifaa hivyo, huku akiambiwa kama hawezi ampe Sh 5,000 (muuguzi) ili akamsaidie.
Alisema ndugu hao walihangaika na kuhakikisha vifaa hivyo vimepatikana, ili huduma ziweze kutolewa kwa mama huyo ambaye alijifungua jana.
Baada ya kusikiliza, Dk Kigwangalla aliyekuwa akitoka chumba cha malalamiko hospitalini hapo na kuambiwa yapo malalamiko mawili tu kutoka kwa wagonjwa yakihusu gharama kubwa za baadhi ya vipimo, alikutana na Mkingi na kumweleza hayo, ambapo Naibu Waziri aliamua kwenda moja kwa moja wadi ya wazazi na kumsaka muuguzi aliyehusika bila mafanikio.
Akiwa wadini hapo, Dk Kigwangalla alionana na mama mjamzito aliyetakiwa vifaa hivyo, ambapo alieleza kuwa baada ya kupimwa alitakiwa kutoa vifaa hivyo na kama hatavipata, atoe fedha ili aweze kuletewa pale alipo.
Dk Kigwangalla aliagiza muuguzi huyo aliyehusika atafutwe, lakini hakupatikana kutokana na wahusika hao kutoweza kutaja majina moja kwa moja. Ndipo Naibu Waziri alipofikia uamuzi wa kuwasimamisha kazi wote ili uchunguzi ufanyike ili apatikane aliyehusika.
Aidha alitembelea chumba cha upasuaji mkubwa wa wazazi hospitalini hapo, upasuaji wa wagonjwa wengine, wadi za watoto na maabara ya hospitali hiyo.
Aliitaka Manispaa ya Temeke inunue vifaa vya wadi hiyo ya upasuaji ili wanawake wajawazito, waweze kuhudumiwa peke yao na kwamba Mkurugenzi wa Manispaa hiyo atajua atakakopata fedha. Alisema ndani ya muda huo atakwenda kukagua na kuona kama wadi hiyo inafanya kazi.
“Mkurugenzi atajua atakapotoa hela, siku 30 nitakuja kukagua nione wodi ya upasuaji inafanya kazi, kama haitakuwa tayari, nitaifunga ili tuone utumishi wenu utakuwa wapi,” alisema Dk Kigwangalla.
Kuhusu wadi ya wazazi, alisema hali ya akinamama wajawazito hairidhishi, kuna msongamano mkubwa na jengo halitoshi, hivyo kwa haraka iongezwe ghorofa nyingine.
Pia chumba cha upasuaji wa wajawazito kikamilike ndani ya siku 30, Manispaa ya Temeke inunue vifaa vya wadi ya upasuaji, wapunguze idadi ya wanaoenda Hospitali ya Taifa Muhimbili, kwani kuwapeleka huko ni kuongeza msongamano.
Dk Kigwangalla alisema wadi mbili za upasuaji zilizomo hospitalini hapo, zina hali mbaya. Alitoa miezi sita zikarabatiwe na zikamilike katika viwango vinavyotakiwa.
Alionya kuwa endapo atakuta ziko hivyo hivyo miezi sita ijayo, atazifunga. Alisema miongozo yote ipo, wahudumu katika hospitali hiyo ni madaktari na wanajua vyema kinachoendelea, hivyo uongozi wa Hospitali umwambie Mkurugenzi aweze kutoa fedha na kuweka kipaumbele katika afya.
Tupe Maoni Yako( Matusi Hapana )
