Kwa mujibu wa habari iliyoandikwa katika gazeti hili jana, tayari shirika hilo limewasilisha katika Mamlaka
ya Udhibiti wa Nishati na Maji (Ewura) maombi ya kushusha bei ya umeme kwa asilimia 1.1.
Katika maombi hayo, Tanesco pia imeamua kuondoa kabisa gharama za maombi ya awali ya wateja wapya, zinazojulikana pia kama gharama za fomu ambazo ni Sh 5,900.
Shirika hilo pia, kupitia maombi yake kwa Ewura linaondoa gharama za huduma (service charges) zinazofikia Sh 5,520 ambazo wateja wa majumbani wamekuwa wakikatwa kila mwezi.
Mkurugenzi wa Tanesco, Felchesmi Mramba, anasema kuwa punguzo hilo la asilimia 1.1 ni kwa mwaka huu lakini matarajio ni kwamba mwaka kesho watapunguza tena kwa asilimia 7.9. Anafafanua kuwa Tanesco imewasilisha maombi yake Ewura pamoja na takwimu halisi zinazoshawishi mantiki ya kubadilishwa kwa bei hizo.
Taarifa zilizopo zinaonesha kwamba tayari Ewaura imeshapokea maombi hayo yanayopaswa kujibiwa ndani ya siku 24 na keshokutwa (Ijumaa), mamlaka hiyo itakutanisha wadau ili kuyajadili.
Matumaini yetu ni kwamba, Ewaura itayapitisha maombi hayo ambayo kwa mujibu wa Mramba, shirika lake limejiridhisha baada ya kufanya tathmini kwamba kwa kumpa mwananchi ahueni hiyo haitaathiri utendaji wa shirika.
Mkurugenzi huyo amekanusha pia madai ya baadhi ya watu wanaosema kwamba serikali imeilazimisha Tanesco kushusha bei ya umeme na wakaonesha wasiwasi kwamba kwa kufanya hivyo shirika litafilisika.
Tumepokea kwa mikono miwili habari hiyo njema inayoakisi kile ambacho kimekuwa kikisemwa kwamba nchi yetu itakapoanza kutumia umeme wa gesi kwa kiwango kinachotakiwa, gharama za umeme zitapungua.
Kwa wale waliokuwa hawaamini kwamba kuna uwezekano wa gharama za umeme siku moja kushuka ndio ambao wamekuwa na hofu kuwa Tanesco itayumba na kudhani kwamba punguzo hili ni la kisiasa.
Kushuka kwa gharama za umeme kunatokana na ukweli kwamba gharama za umeme wa gesi ambao umeongezeka katika gridi ya taifa ni nusu ya gharama za umeme unaozalishwa kwa mafuta.
Ongezeko la umeme wa gesi, linakwenda sambamba na ongezeko la ujazo wa maji katika mabwawa makubwa hasa Mtera, kwa kuwa umeme utokanao na maji ni rahisi pia kulinganisha na wa mafuta.
Wakati tukiipongeza Tanesco kwa hatua hiyo huku tukiwa na matumaini kwamba gharama za umeme zitazidi kupungua mwaka hata mwaka kadri umeme wa gesi unavyoongezeka, shirika hilo litasimama imara katika kuhakikisha haliyumbi.
Wananchi wanatarajia kuona Tanesco ikiwa haiishii kwenye kupunguza gharama za umeme pekee, bali pia kuboresha huduma zao ikiwa ni pamoja na kushughulikia maombi mapya ya kuwekewa umeme kwa muda mfupi. Kwamba Tanesco pia itahakikisha umeme haukatikikatiki sambamba na kuitikia kwa haraka miito ya wateja wao wanapokuwa na tatizo la umeme.
Tupe Maoni Yako( Matusi Hapana )
